DNTT MUNICIPIO BAUCAU

DNTT MUNICIPIO BAUCAU

• Rosantina Maria Guterres nudar vendedora ida hosi subdistritu Venilale, Distritu Baucau, hateten nia lamenta ho desizaun Diresaun Nasional Transporte Terestres (DNTT) Distritu Baucau ne’ebe hapara bis halo sirkula entre Dili ba Venilale ne’ebe fo impaktu bo’ot ba vendedores sira nia moris. 
  Bis direksaun Dili ba-mai Venilale lao ona desde tempu okupasaun Indonesian to’o independensia no vendedores la konkorda ho desizaun hosi DNTT no husu Governu atu halo intervensaun ruma atu sira nafatin desloka entre Venilale no Dili atu buka fila liman.
  “Uluk ne’e ami sosa sasan ho $200 dollar nian funan ne’e $50 dollar selu hotu deit ba kareta atu hare ba familia osan lato’o ona,” hateten vendedora Rosantina foin lalais.
  Entertanto tuir Administrador Subdistritu Venilale, Julio Tome da Silva, liu husi telephone foin lalais (10/10) hateten desizaun atu kansela bis hosi Venilale ba-mai Dili  bazeia ba ezijensia husi naiin mikrolet sira, maibe nia parte seidauk hatene lolos nia motivu tanba seidauk hetan karta ruma husi DNTT Baucau.
  Administrador Subdistritu da Silva hateten katak nia parte koalia ona ho Xefe do Suku sira hodi halo anexo ida ba DNTT hodi hetan resposta.
  “Hau seidak simu karta husi DNTT Baucau, desizaun ne’ebe sira foti ne’e seidauk klaru uluk bis halai to’o Venilale maibe agora lae ne’e tanba sa? Se Venilale la bele entaun Laga, Quelicai, Watulari no Watucarbau mos labele to’o iha ne’e ba,” tenik Administrador Subdistritu. 
  Entertantu tuir komandante Polisia National PNTL, Subdistritu Venilale, Marcal Mauclau hateten katak “polisia halo tuir deit lei ho orden maibe ha’u nia parte mos agora seidauk hetan karta ruma husi DNTT Baucau hodi hapara bis iha Venilale.”
  Iha parte seluk kondotur bis Elia, Alexandre [apelido la fo sai] hateten sira halai bis ne’e DNTT tilan bebeik tanba la bele to’o iha Venilale.
  Nia hatutan uluk sira hola bis ne’e hakarak halai iha Venilale no tanba saida to’o iha Baucau deit, vendedores iha Venilale  barak.
  “Ami sosa bis atu tula  komunidade no vendedores Venilale. Hau koalia ona ho sira Nasional dehan seidauk iha lei ida atu bandu bis halai to’o Venilale. Kondutor ne’ebe uma iha Venilale bele halai to’o iha ne’eba maibe tanba saida sira Baucau hapara ami atu labele halai to’o Venilale,” tenik Alexandre. 
  Uluk komunidade ho vendedores sae bis iha Venilale ba Dili ho deit gastu $5 maibe agora oinseluk ona kumunidade ho vendedores sira tenke sae fali mikrolet ba Baucau $2 dollar, Baucau ba Dili entre $4 to iha $8 no husi terminal Becora ba Merkadu Halilaran $3 to’o $5.
  Ida ne’e hatudu diferensa bo’ot, sira nia produtu labele lori mai Dili tanba deit ho gastu ne’ebe folin bo’ot. 
  Iha parte seluk jurnalistas mos koko konfirma assunte iha leten ho director DNTT Baucau maibe nia la iha fatin tanba sei desloka ba rai liur.